بیجنگ(مانیٹرنگ ڈیسک) معروف کار ساز کمپنی ’آڈی‘ نے چین میں اپنی سیکنڈ ہینڈ گاڑیوں کی فروخت کے لیے ایک ایسا شرمناک اشتہار بنا کر چلا دیا کہ چین بھر میں خواتین سراپا احتجاج ہو گئی ہیں۔
رپورٹ کے مطابق 34سیکنڈ کے اس اشتہار میں ایک دولہا دلہن شادی کے لیے تیار کھڑے ہوتے ہیں اور ایک دوسرے کو قبول کرکے شادی کے بندھن میں بندھنے ہی والے ہوتے ہیں کہ مہمانوں میں بیٹھی دولہے کی ماں اچانک چیخ اٹھتی ہے کہ ”ٹھہرو۔“ یہ کہتے ہی خاتون سٹیج کی طرف بڑھتی ہے اور آ کر دلہن کے چہرے کو غور سے دیکھتی ہے۔ پھر اس کی ناک کو دبوچ کر چیک کرتی ہے اور اس کے کان کو الٹ کر اس کے پیچھے دیکھتی ہے۔
خاتون چیک کر رہی ہوتی ہے کہ اس کی بہو میں کوئی نقص تو نہیں۔ جب وہ دلہن کا تفصیلی ’معائنہ‘ کرکے واپس سٹیج سے اترتی ہے تو ایک بار واپس مڑ کر اپنے بیٹے کو اشارہ کرتی ہے کہ دلہن بہترین ہے، شادی کر لو۔ اسی دوران ماں کی نظر دلہن کی چھاتی پر پڑتی ہے اور بیچاری دلہن ہاتھوں سے اپنی چھاتی چھپا لیتی ہے۔
یہاں سے اشتہار کا دوسرا حصہ شروع ہو جاتا ہے جس میں آڈی کی ایک سیکنڈ ہینڈ گاڑی کو سڑک پر دوڑتے ہوئے دکھایا جاتا ہے اور کہا جاتا ہے کہ ”اہم فیصلہ سوچ سمجھ کر کیا جانا چاہیے۔“ یعنی سیکنڈ ہینڈ گاڑی ٹھوک بجا کر چیک کرکے خریدنی چاہیے۔ کمپنی نے اس اشتہار میں جس طرح لڑکی کو سیکنڈ ہینڈ گاڑی سے تشبیہ دی ہے اس پر چین بھر میں خواتین کی طرف سے شدید ردعمل سامنے آیا جس پر اب کمپنی نے معافی مانگ لی ہے اور اشتہار واپس لے لیا ہے۔
Pak Todays 