پاکستانی اداکار ہمایوں سعید اور اداکارہ مہوش حیات کو مداح ایک ساتھ اسکرین پر دیکھنا کافی پسند کرتے ہیں، ان کی آن سکرین جوڑی کسی بھی ڈرامے یا فلم کو ہٹ کروا سکتی۔

یہ دونوں اداکار بہت جلد ایک ساتھ فلم ‘پنجاب نہیں جاؤں گی’ میں کام کرتے نظر آئیں گے، جس کا ٹریلر حال ہی میں ریلیز ہوا تھا اور اسے شائقین نے خاصہ پسند بھی کیا۔

اور اب فلم کا ایک نیا گانا ‘تیرے نال’ ریلیز کردیا گیا ہے، جس میں صرف ہمایوں سعید اور مہوش حیات کی کیمسٹری ہی پسند نہیں کی جارہی بلکہ گلوکار شفقت امانت علی نے بھی شاندار گلوکاری سے گانے کو مزید خوبصورت بنادیا ہے۔

اس گانے میں ہمایوں سعید اور مہوش حیات کی رومانوی کہانی کو پیش کیا گیا، اس کے علاوہ گانے کی موسیقی اور بول بھی کافی متاثر کُن رہے۔

فلم ‘پنجاب نہیں جاؤں گی’ رواں سال عید الضحیٰ پر سینما گھروں میں نمائش کے لیے پیش کی جائے گی۔